Mbrëmjen e së shtunës, më 19 korrik 2025, në orën 22:00, u nda nga jeta në moshën 77-vjeçare, pas një sëmundjeje të gjatë e të rëndë, At Nikolla Marku, prifti i Kishës Ortodokse Autoqefale Shqiptare “Shën Maria” në Elbasan.
Një figurë e dashur dhe e respektuar, jo vetëm për komunitetin ortodoks, por për gjithë qytetin e Elbasanit, At Nikolla do të mbahet mend për përkushtimin e tij shpirtëror, urtësinë dhe zemrën e hapur ndaj të gjithëve.
I lindur dhe rritur në Elbasan, ai i përkiste brezit të klerikëve që e jetuan thirrjen fetare me përulësi dhe dashuri. Për dekada me radhë, shërbeu në Kishën “Shën Maria” në lagjen Kala, duke e kthyer atë në një qendër të gjallë shpirtërore, ku shumëkush gjente fjalë ngushëlluese, qetësi e mbështetje.
I pranishëm në çdo moment të jetës së komunitetit, në gëzime e dhimbje, në festa e sfida, ai qëndroi gjithmonë i thjeshtë dhe i palodhur në shërbim të Zotit dhe njeriut. Me etikën dhe dashurinë që e karakterizonte, At Nikolla la gjurmë të pashlyeshme në zemrat e shumë njerëzve.
Ngushëllimet po pranohen në Kishën “Shën Maria”, ku ai kaloi gjithë jetën e tij në shërbesë. Ceremonia mortore do të zhvillohet sot, më 20 korrik, në orën 17:00, me pjesëmarrjen e familjarëve, miqve, qytetarëve dhe besimtarëve që do t’i japin lamtumirën e fundit.
Humbja e tij lë një boshllëk të madh, por kujtimi i At Nikollës do të jetojë gjatë — në historinë e kishës, në kujtesën e qytetit dhe në zemrat e të gjithë atyre që e njohën.
U prehsh në paqe, At Nikolla. Qofsh i përjetshëm në lutje dhe kujtime.
