Për njoftimin e akuzës ndaj Ilir Metës dhe Monika Kryemadhit, SPAK u kujdes të njoftonte publikun “se ndalimi dhe shoqërimi i subjektit, Ilir Metaj, është kryer nga Policia e Shtetit, pa pasur përfshirjen e asnjë anëtari të Byrosë Kombëtare të Hetimit (BKH).”
Ky njoftim erdhi pas reagimeve të ashpra të publikut dhe politikës për mënyrën flagrante të ndalimit me forcë të ish-presidentit në mes të ditës, në autostradë. Megjithëse policia në njoftimin e saj deklaroi se Ilir Meta kishte kundërshtuar forcat e rendit, ndaj të cilave ishin detyruar ta shoqëronin me forcë, pyetja që lind është: Pse nuk u shpërndanë foto apo video për ndalimin e deputetit Jurgis Çyrbja? Si është e mundur që asnjë nga të ndaluarit socialistë, me urdhër të SPAK, nuk është filmuar gjatë momentit të arrestimit, siç ndodhi me Ilir Metën?
Çfarë ka dashur të tregojë drejtori i përgjithshëm i policisë, Ilir Proda, me këtë veprim? Mos ndoshta e sikletos fakti që telefoni i tij ndodhet ende nën hetim nga SPAK? Këto janë pyetje që të çojnë në përfundimin se Policia e Shtetit, në rastin e ndalimit të ish-presidentit Ilir Meta, është treguar në rastin më të mirë jo profesionale dhe në rastin më të keq një mjet në duart e politikës, ku spektakli ka më shumë rëndësi se thelbi i asaj që ndodhi sot.
