Monika Kryemadhi, pas daljes nga Prokuroria e Posaçme ku u mor zyrtarisht e pandehur, deklaroi se akuzat ndaj saj mbeten të pandryshuara dhe se tashmë çështja do të kalojë në fazën e gjykimit. Ajo theksoi se hetimi është drejt përfundimit dhe shprehu bindjen se procesi nuk do të zgjasë deri në tetor, siç është parashikuar aktualisht.
“Është e njëjta gjë që ka qenë që në tetor. Do të kemi edhe një thirrje tjetër. Janë të njëjtat akuza. Sipas SPAK, për heqjen e mitrës kam bashkëpunuar me Ilir Metën,” tha Kryemadhi për gazetarët.
Ajo foli edhe për përmbajtjen e dosjes, të cilën e konsideroi voluminoze, dhe kërkoi akses në fashikujt hetimorë. “Dosja është voluminoze. Kërkova fashikujt, më thanë se do të ma japin shumë shpejt. Tashmë do ta fillojmë ballafaqimin në gjykatë,” shtoi ajo, duke theksuar se prokurorët janë në pritje të disa elementëve të fundit për të mbyllur hetimin.
Kryemadhi përmendi gjithashtu se një nga paditë që përfshihet në këtë proces është ajo për çështjen CEZ-DIA, e bërë në shtator të vitit 2017.
Në përfundim të prononcimit të saj, Kryemadhi u ndal edhe te përballja personale me opinionin publik dhe drejtësinë. “Sfidat për mua janë me opinionin publik dhe Zotin. Për mua drejtësia njerëzore është një moment, drejtësia hyjnore është ajo që duhet ta kemi frikë të gjithë. Mos mendoni se jeta ime e mëparshme është më e mirë sot. Shijoni momentin,” u shpreh ajo.
