Minatorët e Bulqizës janë ngritur në protestë dhe kanë bojkotuar punën, duke kërkuar përmirësimin e kushteve të punës në minierë dhe respektimin e detyrimeve ndaj tyre.
Përmes këtij reagimi, punonjësit kanë shprehur pakënaqësinë për kushtet në të cilat punojnë çdo ditë në një nga sektorët më të vështirë dhe më të rrezikshëm të ekonomisë shqiptare. Krahas përmirësimit të kushteve të sigurisë dhe punës, ata kërkojnë edhe marrjen e plotë të pagës së 13-të.
Protesta vjen në një kohë kur minatorët vijojnë të ngrenë shqetësime për trajtimin e tyre dhe përmbushjen e të drejtave ekonomike që, sipas tyre, u takojnë.
Miniera e Bulqizës administrohet nga Yildirim Holding, një nga kompanitë më të mëdha të angazhuara në sektorin minerar në Shqipëri. Deri tani nuk ka një reagim zyrtar nga kompania lidhur me kërkesat e minatorëve dhe bojkotin e punës.
