Një ngjarje e pazakontë ka ndodhur në Zvicër, ku një 21-vjeçar, në përpjekje për t'i shpëtuar një kontrolli policor, ka përfunduar me automjetin e tij brenda kuzhinës së një banese private. Aksidenti i rëndë ka ndodhur rreth orës 02:35 të mëngjesit në zonën e Andwil, në kantonin e St. Gallenit.
Sipas mediave zvicerane, gjithçka nisi kur një patrullë policie në qytetin Gossau tentoi të ndalonte për kontroll drejtuesin e një automjeti tip Mercedes. Por 21-vjeçari nuk iu bind urdhrit të efektivëve dhe u largua me shpejtësi tepër të lartë në drejtim të Andwil, duke kryer disa shkelje të rënda të rregullave të qarkullimit rrugor.
Policia u vu në ndjekje të tij, por arratisja përfundoi në mënyrë dramatike. Teksa po kalonte pranë një servisi automjetesh në Andwil, i riu preku me rrotat e makinës bordurën e djathtë të rrugës dhe humbi kontrollin e drejtimit. Automjeti kaloi të dy korsitë, çau një gardh me shkurre dhe u përplas me forcë në fasadën e një banese.
Goditja ishte aq e fuqishme sa Mercedesi depërtoi përmes murit të jashtëm dhe përfundoi brenda kuzhinës së shtëpisë, duke shkaktuar dëme të jashtëzakonshme materiale.
Në momentin e aksidentit, banorët e shtëpisë ishin në gjumë. Fatmirësisht, asnjëri prej tyre nuk u lëndua. Mediat vendase theksojnë se ngjarja mund të kishte pasur pasoja tragjike nëse familjarët do të kishin qenë në kuzhinë në momentin e përplasjes.
Drejtuesi 21-vjeçar mbeti i plagosur rëndë, por arriti të dilte vetë nga automjeti i shkatërruar. Ai mori ndihmën e parë nga ekipet e urgjencës dhe më pas u transportua në spital për trajtim të specializuar.
Operacioni i largimit të Mercedesit rezultoi veçanërisht i vështirë, pasi makina kishte ngecur mes strukturave të dëmtuara të shtëpisë. Ekipet e shpëtimit u detyruan ta çmontonin pjesërisht automjetin përpara se të arrinin ta nxirrnin nga ndërtesa.
Një ekspert i strukturave të ndërtimit, i angazhuar për vlerësimin e dëmeve, deklaroi për gazetën zvicerane Blick se nuk kishte parë më parë një rast të tillë, ku një automjet të kishte depërtuar plotësisht në katin përdhes të një banese.
