Mario Perlleshaj, autori i dyshuar i vrasjes së Martin Canit, do të qëndrojë në burg. Gjykata e Lartë ka rrëzuar rekursin e paraqitur nga i mituri, i cili ndodhet në paraburgim që prej nëntorit të vitit të kaluar. Kjo ishte hera e tretë që Perlleshaj kërkonte lirimin nga masa e sigurisë, pas refuzimeve edhe në dy shkallët e mëparshme të gjyqësorit.
Ndërkohë, dosja ndaj tij tashmë është mbyllur dhe Gjykata ka marrë zyrtarisht të pandehur Mario Perlleshajn. Nga hetimet dhe analizimi i fakteve është provuar se ai ka konsumuar veprën penale të “vrasjes në rrethana cilësuese” ndaj Martin Canit, ngjarje e ndodhur disa muaj më parë në ambientet e shkollës “Fan Noli” në kryeqytet.
