Ish-oficeri i RENEA-s Altin Morina, i cili ishte në kërkim nga SPAK, përfundoi në prangat e policisë. Policia ndaloi edhe një 25-vjeçar që e ndihmonte të shumëkërkuarin, teksa ai jetonte në arrati. Altin Morina ishte shpallur në kërkim nga SPAK, pasi nga hetimet rezulton se bashkëpunonte me të fortin e Niklës, Durim Bami, në trafikun e drogës. Në dosjen hetimore rezulton se Morina, po ashtu, e informonte të fortin e Niklës për operacionet e policisë.
“Më datë 23.01.2021, në orën 15:32, shtetasi Durim Bami komunikon me shtetasin Altin Morina. Ky i fundit i tregon se ishte bërë merak për Durimin pasi i kishte shkruar 100 herë dhe natën që erdhi RENEA, pasi e kishin lajmëruar çunat e RENEA-s që do shkonin te shoku i tij, Durim Bami. Më pas i tregon se kishte shkuar të takonte dhe kushëririn që ka lokalin te oxhaku për ta lajmëruar, por nuk e kishte gjetur,” thuhet në dosje.
Në dokumentin e SPAK rezulton se Bami komunikon në mënyrë të vazhdueshme, madje ish-oficeri i RENEA-s e porosit Durimin të mos flasë në celular ai dhe as njerëzit e tij, pasi ka një hetim për të dhe janë në përgjim.
Në orën 21:06, Altini i thotë Durimit që sapo kishte folur me dikë, i cili i kishte thënë se ka një procedim dhe se e ka në përgjim, por nëse do donte mund ta shmangte. Këtij personi, Altini i kishte thënë që ta lëshonte, pasi kishte një detyrim dhe se do shkonte ta takonte. Ky personi i kishte thënë Altinit që të porosisë të gjithë që të mos flasin në telefon, pasi janë të gjithë në përgjim. Altini i tregon Durimit se kur të shkojë ta takojë nga afër, pasi nuk flasin në telefon se kanë frikë, do të bëjë gati dhe një “kafe” që t’i tregojë.
Durimi i thotë Altinit se informacioni që ai kishte ishte në lidhje me xhamat e zinj dhe me kontrollin e makinës nëse ishte e rregullt, por Altini i përgjigjet se është kombinacion për të futur ndonjë përgjues në makinë. Gjithashtu, Altini porosit Durimin që njerëzit e tij nuk duhet të flasin as në celular dhe as në ambiente të tjera derisa të marrin vesh se për çfarë bëhet fjalë. Në këto momente, Altini përsërit faktin se kur ta takojë atë personin, do t’i çojnë ndonjë “kafe” dhe t’i sqarojë më tepër, dhe se bëhet fjalë për shefin e komisariatit nr. 2, që është dhe njeriu më i besuar dhe i ngushtë i Drejtorit të Përgjithshëm.
Referuar verifikimeve të kryera, rezulton që në periudhën kohore kur janë kryer komunikimet, Drejtor i Përgjithshëm i Policisë së Shtetit është shtetasi Ardi Veliu”, thuhet në dosje.
Sipas SPAK, Altin Morina dhe Durim Bami bashkëpunonin edhe për lojërat e fatit.
“Durim Bami komunikon me shtetasin Altin Morina, i cili i thotë që të fusin disa kompjutera të mëdhenj kazinosh në 2 pika në Fushë-Krujë, duke shtuar se do flasë që ta mbyllë dhe me ‘shtet’,” theksohet në dosje.
Më tej, Morina e garanton Bamin se do ta zgjidhë me shefat e policisë.
“Durim Bami komunikon me shtetasin Altin Morina dhe diskutojnë sërish në lidhje me kompjuterat e kazinosë. Altini i thotë se do të flasë me shefin e komisariatit të Krujës dhe do të hapin dy pika, një në Fushë-Krujë dhe një në Nikël,” theksohet në dosje.
