Protesta masive kanë përfshirë rrugët e Madridit, ku mijëra qytetarë dolën kundër kryeministrit të Spanjës, Pedro Sanchez, duke kërkuar dorëheqjen e tij pas skandaleve të njëpasnjëshme të korrupsionit që kanë prekur rrethin e afërt të qeverisë së tij.
Demonstruesit marshuan nëpër kryeqytetin spanjoll duke valëvitur flamuj kombëtarë kuq e verdhë dhe duke mbajtur pankarta me mesazhe të forta kundër qeverisë. Në mesin e tyre binte në sy një banderolë e madhe ku shkruhej: “Korrupsioni ka një çmim. Mjaft më me pandëshkueshmëri. Dorëheqje dhe zgjedhje tani.” Ndërsa shumë protestues brohorisnin “Mjaft!”, atmosfera u karakterizua nga tensioni dhe zemërimi ndaj pushtetit aktual.
Tubimi u organizua nga grupimi qytetar Sociedad Civil Espanola, i cili përfshin më shumë se 150 shoqata civile, ndërsa protesta mori edhe mbështetjen e Partisë Popullore konservatore (PP) si dhe partisë së ekstremit të djathtë Vox. Sipas delegatit të qeverisë qendrore në rajon, në marshim morën pjesë rreth 40 mijë persona. Protesta përfundoi pranë Plaza Moncloa, aty ku ndodhet rezidenca zyrtare e kryeministrit Sanchez.
Pas përfundimit të marshimit, situata u tensionua kur një grup i vogël protestuesish tentoi të afrohej drejt rezidencës së kryeministrit, por u ndalua nga forcat e policisë. Mediat e huaja raportojnë se gjatë incidenteve u arrestuan tre persona, ndërsa shtatë efektivë policie mbetën të plagosur lehtë.
