Gjatë një takimi në Horë-Vranisht, Bashkia Himarë, Ministri i Brendshëm Taulant Balla, bashkë me Prefektin e Vlorës Vangjel Tavo dhe Këshillin Vendor të Sigurisë Publike u takuan me banorët e zonës për të forcuar bashkëpunimin kundër kultivimit të lëndëve narkotike.
Balla u ndal te fenomeni i kanabisit duke thënë se fotografimet dhe pamjet e dromëve do t’i përdorin për të luftuar këtë fenomen, por shtoi gjithashtu se do të përdoren dhe për ndërtimet pa leje.
“Fotografimet dhe pamjet e dromëve do t’i përdorim, qoftë në luftën kundër kultivimit të kanabisit, por për fat të mirë do t’i përdorim edhe kundër ndërtimeve pa leje. Për të dhënë një përgjigje përfundimtare ndaj gjithkujt që ende nuk ka vënë mend, se nuk mund të ndërtohet më pa leje. E këtu nuk po flas për riparimet e çative që të jem i qartë ia kam bërë me dije drejtorëve të drejtorive vendore të Policisë dhe po ia përsëris, qeveria i ka marrë masat dhe i ka lehtësuar procedurat maksimalisht kur një familje do të riparojë një çati dhe SPZ nuk ka nevojë më të merren me këtë punë. Mjaft më me historitë e çative të fshatit, merruni me kultivimin e kanabisit, merruni me ndërtimet pa leje në bregdet. Mos u merrni as me stane as me muret rrethuese të shtëpive. Këta këtu, dinë t’i qajnë muret rrethuese. I bëjnë me gurë, i bëjnë pa çimento, i bëjnë pa beton”, tha Balla.
Ai shtoi se fotografimi që do të bëhet nga ajri në mënyrë të vazhdueshme përmes edhe mjeteve ajrore të GdF edhe dronëve ‘Bajraktar’ nxjerr zbuluar gjithkënd. Më tej, Balla tha se Prefekti Tavo, në krye të Komitetit Vendor të Sigurisë Publike do të mbledhë në mënyrë periodike të gjithë drejtuesit e institucioneve.
“Zgjodha qarkun e Vlorës ku së bashku me Prefektin dhe mikun tim të vjetër Vangjel Tavo të ishim sot këtu në bashkinë Himarë, së bashku me kryetaren e bashkisë, së bashku me kryetaret e bashkisë Vlorë dhe Selenicë dhe natyrisht me të gjithë drejtuesit e DVP po dhe po ashtu me miqtë dhe partnerët tanë të GdF, edhe për një arsye që lidhet me faktin që Kuvendi i Shqipërisë sapo ka miratuar ndryshimet në ligjin për Prefektin. Ligji i ri ka shtuar kompetencat e Prefektit duke i dhënë në fakt qëllimin që ka pasur në vetvete, krijimi i këtij institucioni. Prefekti është përfaqësuesi i KM në dhe i Qeverisë në territor dhe si i tillë sikurse KM drejton Këshillin e Ministrave, Prefekti drejton të gjitha Task Forcat, grupet e punës në të gjitha sfidat ku nevojitet koordinimi mes të gjitha agjencive shtetërore dhe ligjzbatuese ne përballjen me fenomenet sikurse është kultivimi dhe këtu jemi për sa i përket Task Forcës antikanabis”, nënvizoi kreu i Ministrisë së Brendshme në takim.
