Një tjetër produkt i bujshëm nga Kim Kardashian ka ndezur debat në rrjet dhe përtej: shapewear për fytyrën, pjesë e markës së saj shumë të suksesshme Skims. Maska prej pëlhure të ngushtë, që shitet për 52 paund dhe u shit brenda 24 orësh, premton të “formësojë dhe skulpturojë” fytyrën gjatë gjumit, duke u bërë pjesë e trendit viral “morning shed” në TikTok – ku njerëzit zbulohen në mëngjes të transformuar pas natës me maska silikoni dhe shirita ngjitës.
Por ndërsa influencerët e lavdërojnë, mjekët estetikë paralajmërojnë se nuk ka asnjë provë shkencore që e mbështet këtë produkt. Dr. Anna Andrienko, mjeke estetike, i tha BBC-së se “këto mbështjellëse mund të ofrojnë vetëm efekte të përkohshme për shkak të presionit dhe mbajtjes së nxehtësisë”. Sipas saj, rezultatet nuk janë të përhershme, dhe në rastin më të keq, përdorimi i tepërt mund të shkaktojë irritime, akne apo probleme me qarkullimin e gjakut, nëse maska vishet shumë ngushtë ose për kohë të gjatë.
Ajo gjithashtu hodhi poshtë pretendimin se produkti është i “infuzuar me fije kolagjeni”, duke shpjeguar se nuk ka prova që pëlhura me kolagjen sjell përfitime reale për lëkurën.
????️????️ Më shumë se një çështje estetike – një sulm ndaj vetëvlerësimit?
Kritikët paralajmërojnë se produktet e tilla nxisin standarde të rrezikshme bukurie, duke forcuar idenë se çdo pjesë e trupit – madje edhe gjatë gjumit – duhet të “rregullohet”. Analistja Porter thotë se kur fillojmë të synojmë zona natyrale si nofulla me produkte shtypëse, dërgohet mesazhi se edhe tiparet normale duhet të ndryshohen.
“Në afat të gjatë, kjo mund të dëmtojë vetëvlerësimin, duke krijuar ndjenjën se nuk je i/e mjaftueshme përveç nëse je duke ndryshuar vazhdimisht pamjen tënde,” thotë ajo.
Ish-modelja Chloe Thomas është dakord, duke shtuar se produkte që premtojnë të hollojnë ose formësojnë fytyrën “na kthejnë pas në kohë në betejën për pranimin e trupit”.
Me miliona ndjekës të rinj në rrjetet sociale, ndikimi i këtij trendi shkon përtej thjesht estetikës – ai prek shëndetin mendor, vetëperceptimin dhe mënyrën si shoqëria shikon “bukurinë”.
