Kryeministri i Kosovës, Albin Kurti, ka kërkuar nga shefja e re e diplomacisë së Bashkimit Evropian, Kaja Kallas, që Serbia të dorëzojë Milan Radoiçiç, të cilin ai e akuzon si organizator të sulmit të ndodhur në Banjskë më 24 shtator të vitit të kaluar.
Kurti u takua me Kallasin të martën në Bruksel, ku diskutuan për progresin e Kosovës në procesin e integrimit evropian, si dhe për raportet me Serbinë. Kryeministri theksoi arritjet e Kosovës në aspektin ekonomik dhe demokratik, duke nënvizuar se vendi ka menaxhuar sfidat më të rënda të sigurisë, përfshirë kërcënimet serioze që kulmuan me vrasjen e rreshterit Afrim Bunjaku.
"Grupi që kreu sulmin në Banjskë, i udhëhequr nga kryekrimineli Milan Radoiçiç, është ende i lirë dhe mbështetet nga Serbia. Kërkojmë, ashtu si në çdo takim tjetër, që Radoiçiç të dorëzohet tek autoritetet e Kosovës, pasi Prokuroria ka një aktakuzë prej 160 faqesh dhe një grup prej mbi 40 personash të përfshirë," tha Kurti.
