Për të dytën ditë radhazi, vala e motit të keq, e quajtur “Bora”, ka përfshirë Greqinë, duke sjellë reshje shiu dhe bore të shoqëruara me stuhi të fuqishme.
Ndikimet më të rënda janë regjistruar në ishujt e Rodosit dhe Limnosit, në Egjeun juglindor, ku banorët kanë kaluar orë të vështira dhe dramatike. Sipas specialistëve, sasia e shiut që ka rënë në Rodos gjatë 16 orëve të fundit ka arritur deri në 75% të asaj që ka rënë në Valencia.
Rrugët e ishullit janë kthyer në përrenj të fuqishëm, duke shkatërruar gjithçka në rrjedhën e tyre, duke rrezikuar jetën e banorëve dhe shkaktuar dëme të mëdha në shtëpi, biznese dhe automjete. Pamjet nga ishulli tregojnë makina të mbuluara nga uji, motoçikleta të groposura pranë trotuareve dhe rrugë të bllokuara nga balta dhe degët e pemëve, ndërsa autoritetet kanë vendosur ndalim qarkullimi.
Edhe në ishullin Limnos, situata është kritike. Dy persona kanë humbur jetën, ndërsa dhjetëra fermerë janë të shqetësuar, pasi nuk mund të shkojnë për të kujdesur për kafshët dhe korrjet e tyre për shkak të rrugëve të mbyllura. Problemet me furnizimin me ujë dhe energji elektrike vazhdojnë të jenë serioze, megjithëse rikthimi gradual i energjisë ka nisur.
Një nga zonat më të goditura është Halkidhikia, në lindje të Selanikut, ku shumë fshatra dhe komuna janë ende pa energji elektrike dhe disa rrugë janë përmbytur. Në Selanik, erërat e fuqishme që kanë arritur shpejtësinë prej 110 km në orë kanë rrëzuar qindra pemë, ndërsa përmbytjet dhe ndërprerja e energjisë elektrike kanë shkaktuar dëme të tjera.
Linjat hekurudhore Selanik-Athinë kanë pësuar gjithashtu probleme, ndërsa borra ka bërë të domosdoshëm përdorimin e zinxhirëve për makinat në disa zona të Maqedonisë Perëndimore, përfshirë Follorinën, Kozanën dhe Kosturin. Përmbytje ka pasur edhe në disa zona të Thessalisë, përreth qytetit të Larisës dhe në Pieria, pranë Katerinit.
Në shumë bashki, përfshirë Rodos, Follorinën dhe Selanik, shkollat janë mbyllur për ditën e hënë. Meteorologët paralajmërojnë se fenomene të tjera ekstreme do të vazhdojnë edhe në orët në vijim.
