Presidenti i Serbisë, Aleksandër Vuçiç, ka deklaruar se Serbia nuk ka lidhje me sulmin që ndodhi në Zubin Potok, në lumin Ibër-Lepenc, dhe se këtë e di edhe pala kosovare. Në një takim me të rinj të partisë së tij, ai theksoi rëndësinë e maturisë në politikë, duke shtuar se nuk ka reaguar menjëherë për të shmangur vendime të nxituara.
Vuçiç u shpreh se Serbia nuk ka nevojë për akte terroriste dhe nuk do të kërkojë falje për diçka që nuk ka bërë, duke shtuar se në fund, "gjërat bien në vend". Ai nënvizoi rëndësinë e punës, luftës dhe besimit te vetvetja në situata të tilla.
