Një shpërthim i fuqishëm ka ndodhur mbrëmjen e kësaj të premteje në mbrëmje në fshatin Varagë të Zubin Potokut në veri të Kosovës. Sipas asaj që bën me dije policia e Kosovës nga shpërthimi është dëmtuar kanali i ujit të Ibër – Lepencit.
Lajmin e ka konfirmuar zëvendësdrejtori i policisë për rajonin e veriut, Veton Elshani. “Po, është dëgjuar një shpërthim në kanalin e ujit dhe ekipet policore janë duke punuar që sa më shpejtë ta zbardhin rastin”, – ka thënë Elshani për “KosovaPress”.
Sipas të njëjtave burime, për shkak të shpërthimit uji ka nisur të rrjedhë në mënyrë të pakontrolluar. Ndërkohë, sipas asaj që raporton media tjetër e Kosovës, “Koha.net”, dyshimet janë se ky shpërthim ka qenë i qëllimshëm për të goditur infrastrukturën që përdoret për ftohjen e termocentraleve Kosova A dhe Kosova B.
Dy ditët e fundit, në veri ka pasur disa incidente të tjera. Në Zveçan u hodhën bomba në stacionin policor dhe në oborrin e komunës. Për shkak të kësaj, policia njoftoi se ka rritur masat e sigurisë në të gjithë vendin.
