Departamenti Amerikan i Shtetit ka dënuar sulmin e ndodhur më 29 nëntor ndaj kanalit të ujësjellësit të Ibër-Lepencit në Kosovë, duke theksuar nevojën e hetimit të shpejtë dhe ndëshkimit të autorëve. Zëdhënësi i DASH, Matthew Miller, e bëri këtë deklaratë përmes një postimi në platformën X, ku theksoi se SHBA do të mbështesë çdo përpjekje për identifikimin dhe ndjekjen e drejtësisë për ata që janë përgjegjës.
“Ne dënojmë sulmin ndaj infrastrukturës ujore në Kosovë. Do të mbështesim përpjekjet për të identifikuar dhe ndëshkuar ata që janë përgjegjës dhe vlerësojmë mbështetjen për këtë çështje. Falënderojmë punonjësit emergjentë dhe KFOR-in për riaktivizimin e furnizimeve të nevojshme,” tha Miller.
Ambasadori i SHBA-së në Kosovë, Jeffrey Hovenier, gjithashtu ka shprehur shqetësimin e thellë të administratës amerikane për situatën e sigurisë në veri të Kosovës pas shpërthimit në kanalin e Ibër-Lepencit. Ky akt është cilësuar si një sulm serioz që dëmton infrastrukturën kritike dhe kërcënon sigurinë publike në vend.
Institucionet vendore dhe ndërkombëtare po punojnë ngushtë për zbardhjen e rastit dhe për rivendosjen e furnizimeve të ujit, ndërkohë që KFOR-i ka luajtur një rol të rëndësishëm në ndihmën emergjente. Autoritetet dhe partnerët ndërkombëtarë janë të angazhuar në zbardhjen e këtij incidenti, i cili po shihet si një kërcënim për stabilitetin dhe sigurinë në rajon.
