Në orët e para të mëngjesit të sotëm, qyteti i Kumanovës është tronditur nga disa incidente të qëllimshme të zjarrvënieve, të cilat kanë përfshirë një lokal, disa makina dhe pjesërisht një shtëpi.
Një zyrë kontabiliteti dhe përkthimesh gjyqësore, e vendosur përballë Gjykatës Themelore në Kumanovë, është djegur. Kjo zyrë, sipas mediave, është në pronësi të Fitor Jakupit, këshilltar në Kuvendin Komunal të Kumanovës.
Gjithashtu, përballë vendit të njohur si Garnizon, një makinë në pronësi të prokurorit Xhelal Bajrami është përfshirë nga flakët, që dyshohet se janë shkaktuar nga koktej molotovi. Po ashtu, është raportuar një tentativë për të djegur makinën e një koloneli me inicialet E.D., e cila ka pësuar dëmtime të lehta.
Si pasojë e një tjetër akti zjarrvënie, flakët kanë përfshirë një shtëpi, duke dëmtuar pjesërisht fasadën e saj. Zjarrfikësit kanë ndërhyrë me shpejtësi, duke arritur të ndalojnë përhapjen e mëtejshme të zjarrit.
Burime jozyrtare raportojnë se në momentet e zjarrvënieve, kamerat e sigurisë pranë këtyre vendeve nuk kanë funksionuar. Autoritetet po hetojnë këto ngjarje, të cilat kanë ngjallur shqetësim dhe pasiguri në qytet.
