Kryetarja e Gjykatës Kushtetuese, Holta Zaçaj, ka shoqëruar sot kryeministrin në një aktivitet të zhvilluar në Madrid.
Edi Rama dhe Holta Zaçaj madje kanë qenë në të njëjtin panel në një organizim të organizatave që merren me jurisprudencën. Tashmë dihet qartas se kryeministri përdor çdo mundësi për t’u shfaqur në aktivitete të tilla me të huaj, ku fjala e tij në fakt nuk është se ka ndonjë vlerë të veçantë në një panel ku flasin juristë të studiove ligjore. Por që kryetarja e Gjykatës Kushtetuese të një vendi të shfaqet në krah të kryeministrit për të ndarë opinione juridike, duket pak e vështirë për t’u përtypur.
Së paku, në respekt të institucionit që përfaqëson, kryetarja e Gjykatës Kushtetuese duhet të kishte zgjedhur një panel tjetër për të mbajtur fjalën e saj. Se për debat me Ramën as që e mendon njeri që ka bërë. Por të paktën, për kohën që i ka mbetur, duhet të respektojë detyrën si kryetare e Gjykatës Kushtetuese.
Për më tepër, në një moment kur nga kjo gjykatë pritet zbardhja e vendimit për përgjimet SKY ECC dhe shpallja e vakancës për anëtaren Bejtja, mandati i së cilës përfundon për pak javë, Holta Zaçaj do të bënte mirë të shfrytëzonte kohën për ndonjë punë, e jo për të qenë “shoqëruesja e parë” e kryeministrit në aktivitete që më shumë ngjajnë si qoka shoqatash jofitimprurëse.
