Sot u mblodh Këshilli i Mandateve për të diskutuar mbi pavlefshmërinë e mandatit të deputetit socialist Vullnet Sinaj, për shkak të përfitimeve financiare të kompanive të tij nga buxheti i shtetit. Mazhoranca dhe opozita kanë rënë dakord që çështja t’i kalojë për shqyrtim seancës plenare.
Deputetja socialiste Klotilda Bushka propozoi që çështja të trajtohet në seancën e parë plenare pas ceremonisë inaugurale të të hënës. Ky propozim hasi në kundërshtimin e kryetarit të Grupit Parlamentar të PD-së, Gazment Bardhi.
“Kompanitë e Sinaj kanë përfituar nga buxheti i shtetit, dhe Kushtetuta nuk parashikon kufizime mbi shumën e përfituar. Kërkojmë që mocioni të përfshihet në rendin e ditës dhe të dërgohet në Gjykatën Kushtetuese. Mos u bëni përsëritës të shkeljes së Kushtetutës,” tha Bardhi.
Nga ana tjetër, Bushka theksoi se maxhoranca mbështet dërgimin e çështjes në Gjykatën Kushtetuese, por në seancën pasuese dhe jo në ceremoninë e të hënës.
Për çështjen e Sinaj, parlamentit do t’i dërgohen dy raporte, një nga mazhoranca dhe një nga opozita. Opozita kërkon që vendimi të merret në seancën e parë të së hënës, ndërsa maxhoranca sugjeron shtyrjen për seancën pas ceremonisë zyrtare.
Vendimi përfundimtar për mandatin e deputetit do të merret nga Gjykata Kushtetuese pas shqyrtimit parlamentar.
