Arrestohet nga Forcat Operacionale në aksin rrugor “Fier–Vlorë” një 20-vjeçar i shpallur në kërkim ndërkombëtar.
Shërbimet e Policisë kanë ndaluar shtetasin O. K., 20 vjeç, banues në Ballsh, i cili ishte shpallur në kërkim ndërkombëtar nga autoritetet italiane.
Gjykata e L’Aquilas në Itali ka caktuar ndaj tij masën e sigurisë “arrest në burg”, për veprën penale “Trafikimi i lëndëve narkotike”, kryer në kuadër të një organizate kriminale.
Për këtë vepër, Kodi Penal italian parashikon një dënim maksimal prej 24 vitesh burgim.
I riu pritet të ekstradohet drejt Italisë për përballjen me drejtësinë italiane.
