Tensionet politike në Kosovë kanë përshkallëzuar në Kuvend, ku deputetja e AAK-së, Time Kadrijaj, ka qëlluar me vezë kryeministrin në detyrë, Albin Kurti, teksa ai po fliste në foltore.
Incidenti ndodhi në momentin kur Kurti po kërkonte sërish kohë shtesë për bisedime me partitë politike, me synim arritjen e një marrëveshjeje për konstituimin e Kuvendit dhe formimin e institucioneve të reja.
Pas incidentit, kryesuesi i seancës, Avni Dehari, ndërpreu punimet e Kuvendit.
Seanca konstituive kishte nisur të enjten, por mbeti pa përfunduar pasi deputetët bënë betimin, ndërsa nuk u arrit zgjedhja e kryetarit të Kuvendit.
Vendimi për shtyrjen e seancës është kundërshtuar nga PDK, LDK dhe Aleanca, të cilat e akuzojnë partinë në pushtet për shpërfillje të vendimit të Gjykatës Kushtetuese për konstituimin e Kuvendit brenda afatit 30-ditor. Opozita ka kërkuar që seanca të vijojë para mesnatës së së premtes.
Në përpjekje për të zhbllokuar situatën, Kurti i ka dërguar një letër kryetarit të PDK-së, Bedri Hamza, duke i ofruar partisë së tij postin e kryetarit të Kuvendit, në këmbim të qëndrimit të 22 deputetëve të PDK-së në sallë gjatë votimit për presidentin.
Kriza politike në Kosovë vijon prej afro dy vitesh, ndërsa partitë politike nuk kanë arritur ende një marrëveshje për formimin e institucioneve të reja.
