Anija Libra e Marinës Italiane është nisur drejt Shqipërisë me grupin e parë të emigrantëve që do të strehohen në qendrat e ngritura posaçërisht për procedura të përshpejtuara kufitare. Ky hap vjen si pjesë e një marrëveshjeje të re mes Italisë dhe Shqipërisë, që synon të lehtësojë presionin mbi qendrat e mbingarkuara në Itali, veçanërisht në ishullin e Lampeduzës.
Në bord, personat që do të transferoheshin iu nënshtruan një kontrolli fillestar për të verifikuar nëse plotësonin kushtet e protokollit të përcaktuar nga Ministria e Brendshme italiane. Këta persona janë të gjithë meshkuj, me origjinë nga vende të sigurta dhe nuk konsiderohen të cenueshëm. Ndërkohë, grupet e ndjeshme si gratë, të miturit, personat që kanë përjetuar tortura dhe ata që kanë nevojë për kujdes mjekësor do të mbeten në Lampeduzë, ku do të përfshihen në qarkun e rregullt të pritjes, në pritje të shqyrtimit të kërkesave për azil nga komisionet territoriale.
Kjo nismë e Ministrisë së Brendshme italiane synon të përmirësojë menaxhimin e krizës së emigracionit dhe të ndihmojë vendet që ndodhen në kufijtë e jashtëm të Bashkimit Evropian të përballen më lehtë me flukset e larta të emigrantëve.
