Prokuroria e Posaçme Kundër Korrupsionit dhe Krimit të Organizuar (SPAK) ka shpallur sot pretencën ndaj 8 të pandehurve të akuzuar në lidhje me aferën e inceneratorit të Tiranës, duke kërkuar dënime me burg për secilin prej tyre.
Për ish-ministrin e Mjedisit, Lefter Koka, SPAK kërkoi një dënim me 4 vjet burg. Të njëjtin dënim prokuroria e kërkoi edhe për Bledar Karolin, Fatjon Muratin, Taulant Tushen dhe Namik Simixhin, të gjithë të akuzuar për përfshirje në këtë çështje.
Ndërkohë, për Valbona Ballgjinin dhe Sidita Koplikun, SPAK kërkoi një dënim me 2 vjet burg secila, i cili të konvertohet në 4 vjet shërbim prove. Po ashtu, për Jetmir Llapajn u kërkua një dënim me 2 vjet burg.
Duke qenë se çështja po gjykohet me procedurë të shkurtuar, të gjitha dënimet e kërkuara do të përfitojnë ulje me 1/3 sipas ligjit në fuqi.
Si masë plotësuese, SPAK kërkoi gjithashtu që të gjithë të pandehurve t’u ndalohet ushtrimi i funksioneve publike për një periudhë prej 5 vitesh.
Procesi gjyqësor pritet të vijojë me seancat e radhës, ku mbrojtja do të paraqesë argumentet e saj për të pandehurit.
