Prokuroria e Elbasanit ka përfunduar hetimet dhe ka dorëzuar për gjykim dosjen penale ndaj Donald Hoxhës, i akuzuar për vrasjen e ish-efektivit të policisë, Roland Rexhepi, i njohur si Doda. Hoxha u ekstradua disa muaj më parë nga Britania e Madhe dhe tashmë do të përballet me drejtësinë për krimin e ndodhur më 22 korrik 2009 në Elbasan. Më herët, për vrasjen e Dodës janë arrestuar dhe dënuar Marjus Tafa dhe Armando Llakaj, përkatësisht me 23 dhe 24 vite burgim, ndërsa po gjykohet edhe Florind Shabani, i njohur si Pacuku. Megjithatë, prokuroria ende nuk ka mundur të identifikojë urdhëruesit dhe financuesit e krimit. Të tre të pandehurit njihen për lidhjet e tyre me fisin Çapja në Elbasan, i cili është në konflikt me Suel Çelën.
