Gjykata e Durrësit ka dënuar me 10 vite burg Xhemal Lokën, i shpallur fajtor për shkaktimin e vetëvrasjes së gruas së tij, Bedrie Loka. Gjatë hetimeve është zbuluar se Loka ushtronte dhunë sistematike ndaj bashkëshortes, çka besohet të ketë çuar në aktin fatal.
Sipas vendimit Nr. 7499, datë 19 dhjetor 2024, Gjykata e ka dënuar Lokën me 7 vite burg për veprën penale të “shkaktimit të vetëvrasjes” (neni 99 i Kodit Penal) dhe me 3 vite të tjera për “mbajtje pa leje dhe prodhim armësh, armëve shpërthyese dhe municionesh” (neni 278/4 i Kodit Penal). Në bazë të nenit 55 të Kodit Penal, dënimet janë bashkuar në një të vetëm prej 10 vitesh burg, që do të vuhet në një institucion të sigurisë së zakonshme, duke filluar nga data e arrestimit të tij.
Prokuroria ka nisur një hetim të ri ndaj të dënuarit, pasi dyshohet se ai ka ushtruar dhunë edhe ndaj fëmijëve të tij.
Njoftimi
Në përfundim të gjykimit, Gjykata me Vendimin Nr. 7499, datë 19.12.2024, ka Vendosur:
1. Deklarimin fajtor të të pandehurit Xh.L për kryerjen e veprës penale “Shkaktimi i vetëvrasjes”, parashikuar nga neni 99 i Kodit Penal dhe dënimin e tij me 7 (shtatë) vite burgim.
2. Deklarimin fajtor të të pandehurit Xh. L.për kryerjen e veprës penale “Mbajtja pa leje dhe prodhimi i armëve, armëve shpërthyese dhe i municionit”, parashikuar nga neni 278 paragrafi i katërt i Kodit Penal dhe dënimin e tij me 3 (tre) vite burgim.
3. Në aplikim të nenit 55 të Kodit Penal, bashkimi i dënimeve në një të vetëm, duke e dënuar përfundimisht me 10 (dhjetë) vite burgim.
4. Vuajtia e dënimit të filloj nga data e arrestimit të tij dhe të kryhet në një burg të sigurisë së zakonshme.
5. Në zbatim të nenit 190 pika 1 gërma “ç” të Kodit të Procedurës Penale provat materiale, të sekuestruara t’i kthehen personit që i takojnë, pasi vendimi të marrë formë të prerë.
6. Në zbatim të nenit 190 pika 1 gërma “a” të Kodit të Procedurës Penale provat materiale, të sekuestruara me procesverbal-Një armë zjarri automatike PPS me nr.89-0579; të kaloj në favor të shtetit pasi vendimi të marrë formë të prerë.
7. Në zbatim të nenit 190 pika 1 gërma “ç” të Kodit të Procedurës Penale provat materiale, të sekuestruara me procesverbal vlerat monetare 2800 (dymijë e tetëqind) Euro dhe 27’000 (njëzet e shtatë mijë) lekë, t’i kthehen personit që i takojnë, pasi vendimi të marrë formë të prerë.
8. Shpenzimet procedurale gjatë hetimeve paraprake si dhe ato gjyqësore i ngarkohen të pandehurit.
9. Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm, brenda 15 (pesëmbëdhjetë) ditëve, duke filluar ky afat nga e nesërmja e njoftimit të vendimit të arsyetuar.
U shpall në Durrës, sot më datë 19.12.2024.
