Sot, në hollin e Pallatit të Kongreseve në Tiranë, po zhvillohen homazhe në nderim të gjyqtarit Astrit Kalaja, i cili humbi jetën dy ditë më parë pas një sulmi me armë zjarri brenda ambienteve të Gjykatës së Apelit, teksa ndodhej në krye të detyrës.
Ngjarja tragjike ka tronditur opinionin publik dhe sistemin e drejtësisë në vend, duke rihapur debatet mbi masat e sigurisë në institucionet shtetërore. Vrasja e një gjyqtari brenda sallës së gjyqit konsiderohet një ngjarje e paprecedentë dhe alarmuese për rendin kushtetues dhe shtetin e së drejtës.
Ceremonia e homazheve zhvillohet nga ora 09:00 deri në 11:00, me pjesëmarrjen e përfaqësuesve më të lartë të institucioneve të drejtësisë, autoriteteve shtetërore, kolegëve, familjarëve dhe miqve të gjyqtarit Kalaja, të cilët i japin sot lamtumirën e fundit.
