Rreth 76% e qytetarëve shqiptarë deklarojnë se arsyeja kryesore për emigrim është marrja e të ardhurave më të larta, duke e lidhur drejtpërdrejt largimin nga vendi me mundësitë më të mira ekonomike jashtë kufijve.
Raporti më i fundit i OECD evidenton se punësimi dhe paga janë faktorët dominues që i nxisin qytetarët të lënë Shqipërinë, qoftë për një periudhë afatshkurtër, qoftë për të jetuar përgjithmonë jashtë.
Sipas të njëjtit raport, mungesa e meritokracisë dhe nepotizmi përbëjnë një tjetër arsye të fortë për emigrim, e përmendur nga 32% e të anketuarve. Gjithashtu, 28% e qytetarëve largimin e lidhin me dëshirën për një të ardhme më të mirë për fëmijët e tyre.
Në rajon, Kosova kryeson me nivelin më të lartë të emigrimit për arsye ekonomike – 85%, ndërsa Bosnja dhe Maqedonia e Veriut ndajnë një përqindje të ngjashme me Shqipërinë, ku 3 nga 4 qytetarë kërkojnë të emigrojnë për të përmirësuar standardin ekonomik të jetesës.
Në Serbi dhe Mal të Zi, 60% e të anketuarve e konsiderojnë ekonominë si shkakun kryesor për të kërkuar jetë më të mirë jashtë vendit.
Korrupsioni renditet gjithashtu ndër arsyet kryesore që nxisin emigrimin. Bosnja dhe Serbia regjistrojnë përqindjet më të larta, respektivisht 24% dhe 23%, të qytetarëve që thonë se korrupsioni i ka shtyrë të mendojnë largimin. Shqipëria ndjek me 20%, pasuar nga Maqedonia e Veriut (17%) dhe Kosova (14%).
