SPAK prej muajsh po heton për veprën penale të korrupsionit që lidhet me kryetarin e Bashkisë së Tiranës Erjon Veliaj dhe në kuadër të kësaj cështje penale u urdhërua sekuestrimi i telefonit celular të Ajola Xoxës, bashkëshortes së kryebashkiakut, si dhe kontrolle në qendrën Harabel, dy shtëpitë e vëllait të tij, Arbër Veliaj, si dhe kompanisë së këtij të fundit, Gogël. Gjatë kontrolleve që u zbatuan të premten nga hetuesit e BKH-së burime të besuara bëjnë me dije se në qendrën Harabel janë zbuluar dhe sekuestruar 80 mijë euro cash. Lidhur me këto para bashkëshortja e Veliajt pritet të japë shpjegime për burimin e këtyre parave. A mundet Ajola Xoxa të mbajë një shumë kaq të madhe cash në ambjentet e biznesit të saj, përderisa është subjekt deklarues? A disponon ajo fatura për këtë shumë që iu sekuestrua? A ka dijeni bashkëshorti i saj kryebashkiaku Veliaj për këto para? Avokatët e Ajola Xoxës dhe Arbër Veliajt janë duke përgatitur ankimimin kundër vendimeve të sekuestrimeve dhe kontrollit, pasi i konsiderojnë të paligjshme. Erjon Veliaj pranoi pas kontrollit se po hetohet pasuria e tij dhe e familjes, ndërsa po hetohet roli i tij në aferën e inceneratorit të Tiranës dhe aferës 5D.
