Faqja zyrtare e Bashkisë së Tiranës ka rënë pre e një sulmi të rëndë kibernetik, për të cilin ka marrë përgjegjësinë grupi “Homeland Justice”. Përmes një mesazhi në kanalin e tyre në Telegram, grupi deklaron se ka marrë të dhëna nga serverat e institucionit dhe i ka fshirë ato.
Ky incident ka sjellë pasoja të menjëhershme për qytetarët, veçanërisht për prindërit që po përpiqen të regjistrojnë fëmijët e tyre në çerdhe dhe kopshte publike përmes platformës e-femijet.tirana.al. Për shkak të mosfunksionimit të sistemit, regjistrimet janë aktualisht të pamundura, ndërkohë që afati për aplikim përfundon më 22 qershor.
Në një deklaratë zyrtare, Bashkia e Tiranës ka pranuar problematikën me serverat dhe ka njoftuar pezullimin e përkohshëm të procesit të aplikimeve:
“Ju informojmë se për shkak të një problematike të serverëve të Bashkisë Tiranë, linku i Platformës së Aplikimeve për Regjistrimin e Fëmijëve në Çerdhet dhe Kopshtet Publike e-femijet.tirana.al nuk është funksional. Në këtë kuadër, procesi i aplikimeve do të pezullohet deri në momentin që platforma do të jetë funksionale. Në vijim do t’ju informojmë kur platforma do të jetë përsëri funksionale dhe mbi shtyrjen e afatit të aplikimeve,” – thuhet në njoftimin e institucionit.
Aktualisht nuk dihet ende nëse Bashkia do të shtyjë afatin për aplikime, një vendim që mbetet i shumëpritur nga qindra prindër të shqetësuar.
Autoritetet nuk kanë dhënë ende detaje nëse të dhënat janë komprometuar dhe në çfarë mase, ndërsa nuk ka një reagim nga Agjencia Kombëtare e Shoqërisë së Informacionit (AKSHI) për incidentin. Hetimet janë në zhvillim.
