Pas provimit të tretë të Maturës Shtetërore dhe dështimit të radhës së Ministrisë së Arsimit me administrimin e këtij procesi, ish-drejtues dhe ekspertë të arsimit po theksojnë problematikat e vërejtura edhe këtë vit.
Në A2 CNN, Fatmir Vejsiu analizoi provimin e Matematikës dhe mënyrën e hartimit të tezës. Sipas tij, hartuesit e pyetjeve nuk kanë respektuar rregulloren dhe as nivelet e vështirësisë së tezës. Testi kishte shumë pyetje të thjeshta dhe të nivelit mesatar, çka për ekspertin e Matematikës nxjerr në pah mungesën e hartuesve të specializuar për këtë proces.
Ish-drejtori i Arsimit Parauniversitar në Ministrinë e Arsimit pranon se dalja e tezës dhe veçanërisht rifutja e saj me ushtrimet e zgjidhura tregon se procesi i administrimit është shkelur rëndë. Fatmir Vejsiu zbulon raste flagrante kur bëhet fjalë për fëmijë deputetësh apo kryetarë bashkish.
Për Fatmir Vejsiun, Matura Shtetërore është një proces i huazuar, i cili jashtë vendit tonë funksionon mjaft mirë. Sipas tij, mungesa e seriozitetit dhe angazhimit nga Ministria bën që ky proces të dështojë në shumë hallka të tij.
20 vite më parë, dalja e tezës së Konkursit të Drejtësisë shkaktoi skandal dhe anulim të menjëhershëm të konkursit. Sot, pas 20 vitesh, është bërë e zakonshme që pas nisjes së çdo provimi të Maturës Shtetërore, teza jo vetëm del në rrjetet sociale, por edhe rifutet në ambientet e provimit me ushtrime të zgjidhura.
Për ministren e Arsimit, kjo nuk përbën shkelje dhe as cenim të Maturës Shtetërore, procesi i vetëm që aplikohet në vendin tonë për hyrjen e maturantëve në shkollat e larta.
