Ministri i Drejtësisë, Toni Gogu, ka bërë të ditur se burgu i Shënkollit në Lezhë do të transformohet në një institucion të specializuar të shëndetit mendor për të dënuarit, një projekt që sipas tij do të kërkojë disa vite për t’u realizuar.
Gjatë një konference për shtyp, Gogu tha se institucioni do të shërbejë për trajtimin e të dënuarve me probleme të shëndetit mendor, sipas standardeve që zbatohen në vendet europiane.
“Kemi një plan dhe do të jetë institucion i shëndetit mendor. Atje do të trajtohen të dënuarit ashtu siç trajtohen të dënuarit që vuajnë nga probleme të shëndetit mendor në çdo vend europian. Do të marrë disa vjet”, deklaroi ai.
Ministri shtoi se Ministria e Drejtësisë synon gjithashtu të rrisë sigurinë në institucionet e vuajtjes së dënimit dhe të zgjerojë programet e rehabilitimit.
Gogu njoftoi gjithashtu masa të reja për përmirësimin e shërbimit në Agjencinë e Trajtimit të Pronave. Sipas tij, drejtori i përgjithshëm do të presë qytetarët dy ditë në javë: çdo të mërkurë për çështjet e kompensimit të pronës dhe çdo të enjte për njohjen e pronësisë.
“Çdo të mërkurë, të gjithë ata që kanë problem me Agjencinë e Trajtimit të Pronave, drejtori ju pret për kthimin e kompensimit dhe të enjteve për njohjen e pronësisë. Drejtori i Përgjithshëm ka hartuar një plan për shërbimin ndaj qytetarëve dhe e dimë fare mirë që është një nga ato tema që çdo familje ka përjetim të hidhur”, tha ai.
Sa i përket amnistisë penale që u zbatua më 15 korrik, ministri bëri të ditur se 2 300 persona kanë përfituar. Ai theksoi se kriteret janë miratuar nga Kuvendi dhe se nga amnistia janë përjashtuar personat e dënuar për krim të organizuar, korrupsion, vrasje në rrethana cilësuese dhe terrorizëm.
Gogu shtoi se shtatë të miturit e liruar po mbështeten me programe individuale riintegrimi.
