Gjykata e Posaçme vendosi t’i kthejë SPAK-ut dosjen penale ndaj mjekut kardiokirurg Edvin Prifti. Gjatë seancës, prokurori i çështjes kërkoi kohë për të plotësuar dosjen me një akt të ri ekspertimi financiar, kërkesë e cila u pranua nga gjykata. Seanca e radhës u caktua të zhvillohet më 7 prill, pasi gjyqtarja Elsa Ulliri e konsideroi të mjaftueshme kohën e lënë në dispozicion të prokurorisë.
Edvin Prifti, ish-shefi i Shërbimit të Kardiokirurgjisë pranë Qendrës Spitalore Universitare “Nënë Tereza”, akuzohet për korrupsion dhe pastrim parash. Ai u vu nën hetim nga SPAK pasi u përgjuar gjatë një hetimi mbi një skandal korrupsioni në Gjykatën e Krujës, i cili çoi në arrestimin e gjyqtares Enkelejda Hoxha. Në atë kohë, gjatë kontrollit në zyrën dhe banesën e mjekut, u gjet një sasi e madhe parash.
Për një periudhë të gjatë, Prifti qëndroi i pezulluar dhe nuk mund të kryente ndërhyrje kirurgjikale në zemër. Aktualisht, ai është rikthyer në sallën e operacionit, ndërsa vijon të përballet me drejtësinë.
