Policia e Shtetit lajmëron qytetarët se Daut Laze që u arratis nga burgu i Lezhës paraqet rrezikshmëri të lartë shoqërore dhe bën thirrje të bashkëpunojne për arrestimin e tij. Për çdo informacion të vlefshëm vë në dispozicion si shpërblim shumën prej 10 mijë eurosh.
Policia e Shtetit ka nisur një operacion intensiv për kapjen e Daut Laze, 49 vjeç, i cili është konstatuar i zhdukur në orët e para të mëngjesit të sotëm nga Institucioni i Posaçëm Mjekësor në Lezhë. Arratisja u zbulua gjatë ndërrimit të turneve dhe kryerjes së apelit rutinë.
Daut Laze ishte arrestuar në vitin 2021 për veprën penale “Dhuna në familje”, ndërsa në vitin 2024, Gjykata e Tiranës i kishte caktuar masën “Mjekimi i detyruar në një institucion mjekësor” për shkak të rrezikshmërisë së lartë shoqërore që paraqet.
Policia e Shtetit, në bashkëpunim me Drejtorinë e Përgjithshme të Burgjeve, po kryen kontrolle të shumta në terren për lokalizimin dhe kapjen e tij. Për të ndihmuar në këtë proces, Policia ka vënë në dispozicion një shpërblim prej 10,000 eurosh për çdo informacion të vlefshëm që çon në gjetjen e vendndodhjes së 49-vjeçarit.
Qytetarët që kanë informacion mund të kontaktojnë menjëherë në numrin pa pagesë 112 të Policisë së Shtetit ose në numrin 068 200 29 61, të vendosur nga Drejtoria e Përgjithshme e Burgjeve.
Policia apelon për vigjilencë dhe bashkëpunim nga ana e qytetarëve, duke garantuar ruajtjen e anonimatit për çdo denoncim. Operacioni për kapjen e të arratisurit vijon me intensitet të lartë.
