Në Gjykatën e Posaçme u zhvillua këtë të hënë seanca gjyqësore ndaj Dritan, alias Gramos Rexhepi, dhe të pandehurve të tjerë të akuzuar për rrëmbimin dhe zhdukjen e Jan Prengës.
Dritan Rexhepi, i sapoekstraduar nga Turqia, nuk u paraqit në seancë, por kërkoi përmes një shkrese të përfaqësohej nga avokatja e tij. Mbrojtësja ligjore sqaroi se ai nuk ishte paraqitur, pasi duhej të shoqërohej të premten nga burgu i Fierit drejt paraburgimit 313. Aktualisht, Rexhepi ndodhet në burgun e Fierit, ku vuan një dënim prej 25 vitesh burg për vrasjen e një efektivi policie në vitin 1999 dhe të një personi tjetër, krime të kryera në Fushë-Krujë.
Avokatja e tij kërkoi nga gjykata që seancat të caktoheshin në ditë të tjera, me përjashtim të së hënës dhe së premtes.
Në vijim të seancës, SPAK paraqiti provat shkresore kundër të pandehurve, përfshirë kqyrjen e vendit të ngjarjes, të cilat vërtetojnë se viktima është Jan Prenga. Sipas SPAK, gjurmët e gjakut të zbuluara në resortin “Golden” të Altin Hajrit, ku dyshohet se u mbajt trupi i pajetë i Prengës, janë krahasuar me ADN-në e nënës së tij dhe kanë rezultuar të përputhshme. Kjo provon se Jan Prenga, babai i tre fëmijëve, ka humbur jetën.
Gjithashtu, pamjet filmike tregojnë se viktima ishte mbajtur nën vëzhgim nga rrëmbyesit për disa ditë me radhë. Sipas hetimeve, rrëmbimi i Jan Prengës u krye si hakmarrje ndaj vëllait të tij, i cili kishte vjedhur një sasi të madhe droge në një port të Britanisë së Madhe. Droga dyshohet se i përkiste Dritan Rexhepit dhe Gentian Docit (Funiqit).
Për zhdukjen e Jan Prengës po gjykohen në dy procese të ndara kopshtari i "Golden Resort", Festim Bexhdili, dhe pronari i resortit, Altin Hajri.
