Nikollë Sherrniku, i cili akuzohet si një nga personat e përfshirë në masakrën e Don Boskos, ku nga të shtënat me armë ndaj lokalit të Fation Muratit në Don Bosko, mbeti e vrarë banakierja Mimoza Paja dhe u plagosën disa të tjerë, është vetëm një hap larg lirimit nga qelia. Ai u akuzua nga prokuroria për krijim të kushteve për të kryer vrasje, pasi dyshohet se vodhi targat e një automjeti në Gjermani, të cilat u përdorën në masakër. Gjykata e Tiranës dënoi me 5 vite burg, për vendimi u prish nga gjykata e Apelit dhe gjithçka është kthyer në pikën zero.
Sherrniku pritet të nisë nesër përballjen me gjykatën e Tiranës ku do të rigjykohet, edhe pse ai këmbëngul se në kohën kur janë vjedhur targat dhe më pas ndodhi masakra, ka qenë në paraburgim dhe se nuk ka asnjë lidhje. Ai mbahet në paraburgim prej qershorit 2023 dhe po mbushen gati 2 vjet nga dita e arrestimit, pritet që avokatët e tij të bëjnë kërkesë për zëvendesimin e masës së sigurisë.
Sherrniku njihet si një prej njerëzve të Ervis Martinaj dhe për masakrën ku mbeti viktime Mimoza Paja, dyshohet të ketë ardhur si pasojë e përplasjes mes grupit të Martinajt me Fation Muratin, pasi ky i fundit ka qenë një prej personave që u shpall në kërkim policor pas vrasjes së Brilant Martinaj dhe dy miqve të tij, Dikler Vata e Besmir Hoxha te mbikalimi i Fushë Krujës. Sherrniku ka vendosur të kyçë gojën për hetuesit, cka duket se masakra e Don Boskos do të vijojë të mbetet një ngjarje pa autor.
