Një person ka humbur jetën dhe pesë të tjerë janë plagosur, tre prej tyre në gjendje të rëndë, si pasojë e një sulmi me armë zjarri të ndodhur në periferi të Parisit, në Francë. Mes të plagosurve është edhe një vajzë 12-vjeçare. Autoritetet franceze kanë nisur hetimet për ngjarjen si një akt të dyshuar terrorist, ndërsa personi i dyshuar si autor i sulmit është arrestuar nga policia.
Sipas informacioneve të publikuara nga BBC, sulmi ka ndodhur në disa zona të qytetit Trappes, në jugperëndim të Parisit, dhe më pas ka vijuar në qytetin fqinj La Verrière.
Ministri francez i Brendshëm, Laurent Nuñez, deklaroi se sulmi ka zgjatur rreth 15 minuta dhe se autoritetet po e trajtojnë ngjarjen si krim terrorist.
“Është qartësisht një krim terrorist. Këtë e ka konfirmuar edhe prokurori”, deklaroi Nuñez gjatë një prononcimi për mediat në Trappes.
Autori qëlloi nga automjeti ndaj qytetarëve
Sipas kryetarit të Bashkisë së Trappes, Ali Rabeh, autori ka lëvizur nëpër disa lagje me një automjet të tipit Renault Clio, me ngjyrë gri, duke hapur zjarr ndaj personave që ndodheshin në rrugë.
Të shtënat janë regjistruar në disa vendndodhje, përfshirë një pikë karburanti, një qendër shëndetësore dhe një kënd lojërash për fëmijë. Kryebashkiaku deklaroi se sulmuesi dukej se kishte qëlluar në mënyrë të rastësishme, me synimin për të shkaktuar sa më shumë viktima.
“Ai donte të shkaktonte një masakër”, u shpreh Rabeh, duke përshkruar mënyrën se si ishte zhvilluar sulmi.
Pas të shtënave në Trappes, autori dyshohet se ka vijuar drejt La Verrière, duke qëlluar herë pas here nga dritarja e automjetit.
Policia franceze ndërhyri dhe arrestoi të dyshuarin në zonën pranë rrugës kryesore N10. Mediat lokale kanë raportuar gjithashtu se arrestimi është kryer pranë qytetit Coignières.
Mes të plagosurve një vajzë 12-vjeçare, e qëlluar tetë herë
Një nga rastet më të rënda të sulmit është ai i një vajze 12-vjeçare, e cila ka pësuar tetë plagë nga armët e zjarrit dhe është dërguar për ndërhyrje kirurgjikale.
Nëna e saj, duke folur për radion franceze RTL, ka shprehur tronditjen për atë që i ka ndodhur së bijës.
“Si mund t'ia bëjë dikush këtë një fëmije?”, është shprehur ajo.
Nëna ka treguar se vajza mbante shami në kokë dhe ka ngritur dyshime nëse kjo mund të ketë qenë arsyeja për të cilën është vënë në shënjestër.
“Ajo është një fëmijë e lindur në Francë, në Trappes. Ka të drejtë të jetojë në Francë dhe të ndërtojë jetën e saj këtu”, deklaroi nëna.
Dyshime për motiv racist dhe islamofob
Autoritetet po shqyrtojnë mundësinë që sulmi të ketë pasur motive raciste ose islamofobe.
Kryebashkiaku Ali Rabeh deklaroi se viktima që humbi jetën ishte me origjinë afrikane, ndërsa një prej personave në gjendje kritike ishte me origjinë nga Afrika e Veriut. Sipas tij, sulmi kishte një karakter të mundshëm racist dhe islamofob. Sipas raportimeve të mediave franceze, personi i arrestuar është një 39-vjeçar, i cili rezultonte i njohur për policinë, por jo për shërbimet e inteligjencës.
Prokuroria antiterrorizëm ka konfirmuar për televizionin BFMTV se ai nuk ishte përfshirë në listën e personave që konsiderohen kërcënim serioz për sigurinë kombëtare të Francës. Lidhur me armën e përdorur, një drejtues i policisë lokale deklaroi se bëhej fjalë për një armë gjysmëautomatike të modelit të vjetër, e aftë për të kryer të shtëna në seri.
Gazeta franceze Le Parisien ka raportuar se arma mund të datojë që nga periudha e Luftës së Dytë Botërore.
Prokuroria antiterrorizëm zgjeron hetimet
Prokuroria Kombëtare Antiterrorizëm ka përfshirë në hetim disa vepra të rënda penale, mes tyre vrasjen e lidhur me një veprimtari terroriste, mbajtjen e paligjshme të një arme të kategorisë A dhe dyshimet për komplot terrorist me qëllim përgatitjen e krimeve kundër personave.
Kategoria A përfshin armë të nivelit ushtarak dhe armë me aftësi për të qëlluar në seri. Hetuesit po punojnë për të përcaktuar motivin e saktë të sulmit, mënyrën se si autori ka siguruar armën dhe nëse ka pasur persona të tjerë të përfshirë në përgatitjen e ngjarjes.
