Franca po përballet me një krizë të rëndë politike dhe të sigurisë pas protestave të dhunshme të 17 tetorit, të cilat shkaktuan përleshje masive, plaçkitje dhe shkatërrime në disa qytete. Ministri i Brendshëm, Laurent Nuñez, i ka paraqitur dorëheqjen presidentit Emmanuel Macron, por ky i fundit ka vendosur ta refuzojë.
Sipas njoftimit të Pallatit Élysée, dorëheqja është paraqitur të dielën, ndërsa vendimi i presidentit është bërë publik këtë të hënë, më 19 tetor. Macron ka argumentuar se situata kërkon vazhdimësi në drejtimin e forcave të rendit, duke shmangur ndryshimet në krye të Ministrisë së Brendshme në një moment kritik për vendin.
Megjithatë, presidenti francez ka pranuar se gjatë menaxhimit të protestave ka pasur dështime në parashikimin e situatës dhe në punën e shërbimeve të inteligjencës. Ai i ka kërkuar ministrit të Brendshëm të zbatojë sa më shpejt metoda të reja për përballimin e grupeve të dhunshme që shkatërrojnë pronën publike dhe private.
Bilanci i trazirave është i rëndë. Sipas autoriteteve franceze, 2,400 persona janë ndaluar, ndërsa afro 1,000 efektivë të forcave të rendit kanë mbetur të plagosur. Vetëm në Marsejë, autoritetet kanë raportuar deri në 30 mijë persona të përfshirë në plaçkitje gjatë së shtunës.
Dhuna ka shkaktuar dëme të mëdha edhe në sektorin tregtar. Rreth 1,500 biznese janë sulmuar, ndërsa dëmet materiale përllogariten në disa qindra milionë euro.
Në një fjalim solemn të dielën në mbrëmje, Macron dënoi ashpër aktet e dhunës, duke paralajmëruar se personat që kanë tentuar të destabilizojnë Republikën do të përballen me përgjegjësinë ligjore.
“Ndjejmë të gjithë zemërim dhe turp”, deklaroi presidenti francez, duke kërkuar transparencë për mënyrën se si autoritetet menaxhuan situatën.
Ndërkohë, tensionet kanë vijuar edhe gjatë natës. Përleshje të reja janë regjistruar në Sheshin e Republikës në Paris, ndërsa tentativa për plaçkitje janë raportuar edhe në Lion dhe Marsejë. Vetëm në kryeqytet, policia ka njoftuar 92 persona të ndaluar deri rreth mesnatës.
Kriza ka shkaktuar reagime të forta politike. Marine Le Pen ka paralajmëruar për një krizë të thellë besimi dhe autoriteti që kërcënon demokracinë, ndërsa lideri i së majtës radikale, Jean-Luc Mélenchon, ka akuzuar Macronin se po lejon përkeqësimin e situatës.
Përballë përshkallëzimit të dhunës, kryeministri Sébastien Lecornu ka thirrur një mbledhje ndërministrore të krizës për të diskutuar dëmet ekonomike, sigurimet dhe ndjekjen penale të personave të përfshirë në trazira.
Ndërkohë, përfaqësues të bizneseve, bankave, kompanive të sigurimeve dhe sektorit të hotelerisë pritet të zhvillojnë takime me autoritetet për të vlerësuar dëmet dhe masat e nevojshme.
Situata e ka vendosur qeverinë franceze përballë një presioni të madh politik, vetëm gjashtë muaj përpara zgjedhjeve presidenciale, ndërsa autoritetet përpiqen të rikthejnë rendin pas një prej fundjavave më të dhunshme të raportuara në vend.
Burimi: BFMTV (BFM TV), Francë.
