Një 16 vjeçar afgan, në kërkim të një jetë më të mirë, ka përfunduar i marrë peng nga një familje në Shkodër. Pas largimit nga vendlindja e tij, 16 vjeçari është ndalur tranzit në Shqipëri, konkretisht në Shkodër. Në kushtet e mbijetesës ka kërkuar punësim të përkohshëm në një servis. Pas pak kohësh ka kërkuar largimin nga puna me synimin për t'u larguar edhe nga Shqipëria, por ka gjetur kundërshtimin e pronarëve. Edhe pse i vetëm, i mituri ka njoftuar familjen e tij dhe më pas, edhe policinë. Policia e Shkodrës ka ndërhyrë duke shpëtuar të miturin dhe kanë arrestuar njërin prej djemve të familjes Pashuku, Alehandron 18 vjeç që akuzohet për “Prodhim dhe mbajtje pa leje e armëve, armëve shpërthyese dhe municionit” si dhe kanë shpallur në kërkim djalin tjetër, Kristjan Pashukun për veprën penale “Trafikim i të miturve”. Policia e Shkodrëss njofton se janë proceduar penalisht edhe vëllai tjetër dhe kryefamiljari i familjes Pashuku. Gjatë kontrollit të ushtruar në servisin në pronësi të këtyre shtetasve, Policia gjeti dhe sekuestroi në cilësinë e provës materiale një armë zjarri automatik, një armë zjarri pistoletë imituese zhurme, një armë sportive pneumatike dhe municion luftarak.
