Me një pasaportë të falsifikuar në duar, të siguruar nga një grup i strukturuar kriminal që është goditur tashmë nga SPAK, shumë shqiptarë kanë synuar Mbretërinë e Bashkuar. Disa prej tyre ja kanë dalë mbanë e të tjerë janë ndaluar në aeroportet e Spanjës.
Hetimet treguan se grupi kriminal falsifikonte pasaporta në një laborator në Kosovë, pajiste me to shqiptarët të cilët akomodoheshin në Spanjë dhe në momentin që u dërgohej dokumenti i falsifikuar udhëtonin për në Irlandë. Në aeroporte ata vëzhgoheshin nga anëtarët e grupit derisa ngjiteshin në avion.
Sipas dosjes hetimore të siguruar nga VNA rezulton se paguanin nga 12-15 mijë euro.
Për të shkatërruar grupin kriminal, në ndihmë të policisë erdhi dhe një agjent i infiltruar.
Grupet kriminale
Në dosjen e SPAK thuhet se përgjatë viteve 2022-2024 janë evidentuar disa grupe kriminale të lidhur me dhënien ndihmë për kalim të paligjshëm shtetasve shqiptarë me qëllim udhëtimin e tyre drejt Mbretërisë së Bashkuar, Amerikës dhe Kanadasë.
Nga hetimet rezulton se këto grupe janë të përfshirë në prodhimin e dokumentave të falsifikuara të identifikimit, kryesisht të dokumentave të vendeve të BE-së, në gjetjen dhe ndërmjetësimin e shtetasve shqiptarë që kërkonin të udhëtonin drejt Mbretërisë së Bashkuar, Amerikës dhe Kanadasë.
Sipas Prokurorisë së Posacme, Bashkim Sula rezulton të jetë kreu i grupit kriminal dhe ka lidhje me të gjithë personat nën hetim, përfshirë që nga prodhimi i dokumentave të falsifikuara deri tek mbërritja në Mbretërinë e Bashkuar, nëpërmjet Irlandës së Veriut. Dokumentat duket se prodhohen nga një burim i përbashkët, ato janë vecanërisht pasaporta sllovene, italiane, rumune etj, të cilat të bëjnë të besosh se lidhen me të njëjtin burim prodhimi i cili besohet të jetë në Kosovë.
Xhelal Krasniqi dhe Fitim Rama, me shtetasi kosovare sigurojnë pasaportat e falsifikuara, të cilat prodhohen në Kosovë, ndërsa Njazi Ademi është personi që bie në kontakt me personat e interesuar për të udhëtuar drejt këtyre vendeve. Nga hetimet del në pah se ai diskuton mbi detajet, mënyën e pagesës si dhe përcjell dokumenta të nevojshme si fotografi, etj, pra luan rolin e ndërmjetësit. Njëkohësisht ai siguron dokumenta të ndryshme të falsifikuara, si karta identiteti, patenta etj, dhe tek personi nën hetim Ylli Brahimaj.
Pasi sigurohen dokumentat false, nëpërmjet agjencisë Domi Travel, me ortak e administrator Rezart Domi, personat që synojnë Mbretërinë e Bashkuar, Shtetet e Bashkuara të Amerikës apo Kanadanë trasportohen në Spanjë, kryesisht në Tarragonë.
Në rast se personat udhëtojnë në rrugë ajrore, ata udhëzohen dhe akomodohen në hotele të njëjtë me drejtuesit e mjeteve. Atje udhëzohen mbi itinerarin që do të ndjekin dhe iu japin numrin e kontaktit te personi që i pret në Irlandën e Vberiut.
Pagesat variojnë nga 12 mijë deri në 15 mijë euro dhe kryhet menjëherë pasi personat mbërrijnë në Mbretërinë e Bashkuar.
Nga hetimet edhte identifikuar edhe Gridi Elezi si person që bashkëpunon me grupin kriminal dhe siguron dokumenta të falsifikuara. Në të njëjtën mëyrë vepron edhe agjencia Boris Travel. Gjatë hetimit janë dokumentuar mbi 44 rast të shtetasve shqiptarë për përdorim të pasaportave të falsifikuara.
Në këtë grup kriminal, SPAK ka dyshime se është i përfshirë dhe oficeri i policisë, Roland Islamaj, për të cilin thotë se pavarësisht që ka patur dijeni për aktivitetin kriminal nuk e ka kallëzuar atë.
Nga hetimet e SPAK rezulton se grupet kriminale që mundësojnë dhënien ndihmë për kalim të paligjshëm drejt SHBA-së apo Kanadasë, dyshohet se manipulojnë procesin e aplikimeve për viza për në këto vende, në ambasadat e ndodhura në Shqipëri apo në Kosovë, përmjet dokumentacionit të falsifikuara. Ata udhëzojnë personat që kanë aplikuar për viza se si të sillen gjatë procesit të intervistimit apo në aeroport.
Në drejtim të grupit kriminal është Ylli Caushaj, i cili në rolin e drejtuesit organizon punën, gjen e takon personat, i instrukton ato. Pjesë e procesit të takimeve, udhëtimeve adhe aplikimeve për viza është edhe Eriola Spaho, e cila në rolin e avokates ndihmon në plotësimin e procedurave të aplikimit për vizë, duke manipuluar procesin me dokumenta të ndryshme.
Agjenti i infiltruar
Për të shkatërruar grupin kriminal, policia infiltroi në radhët e tij një agjent, i cili krijoi kontaktet dhe udhëtoi drejt Spanjës, me qëllim që më pas të arrinte në Mbretërinë e Bashkuar. Madje në një rast në dosje thuhet se autoritetet spanjolle inskenuan arrestimin e agjentit të infiltruar me qëllim identifikimin e anëtarëve të grupit kriminal.
Ndër të tjera në dosje thuhet se, një person i paidentifikuar i shkruan në whats up agjentit nën mbulim dhe i kërkon t’i dërgojë me foto pasaportën shqiptare dhe atë të falsifikuar pasi i duheshin për të prerë biletat e udhëtimit me avion.
Nga hetimet rezulton se për cdo person priteshin dy bileta, një me pasaportë shqiptare dhe një me pasaportën e falsifikuar. “Personi i paidentifikuar i shkruan sërish agjentit dhe pas komunikimeve të vazhueshme e sqaron se do të nisej nga Barcelona drejt Dublinit në Irlandë dhe për momentin të priste në Barcelonë udhëzime të tjera. Personi në fjalë e telefon dhe e sqaron sërish agjentin se duhet të shkonte në aeroportin e Barcelonës dhe kur të ndodhej atje do t’i dërgonte biletat me foto.
Më vonë, ai i dërgon agjentit dy fotografi të biletave të udhëtimit me acion, një drejt Dublinit, të prerë me pasaportën false italiane dhe një drejt Tiranës, të prerë ne pasaportën shqiptare”, thuhet në dosje. Në vijim, ai e sqaron agjentin se gjatë kontrollit fizik njërës pasaportë do ta mbante me vete dhe njerën do ta linte në cantë, te kontrolli i pasaportave, të tregonte pasaportën shqiptare. Nëse e pyesnin duhet të tregonte po kthehej në Shqipëri. Më pas të shkonte te porta e hyrjes për në avionin drejt Dublinit dhe nëse në Dublin e kapnin e orientoi t’u thoshte autoriteteve se në Shqipëri donin ta vrisnin dhe ta merrte në telefon nëse kishte probleme të tjera, por asnjëherë nuk i tha që do ta takonte, për cdo gjë e sqaroi nga telefoni. Në momentin që agjenti mbërrin të porta e hyrjes për në avion, komunikon prapë me personin e paidentifikuar.
Ai i thotë se duhet të rrinte i 4 ose i 5 në radhës. Agjenti nën mbulim “ndalohet” nga policia spanjolle me dyshimin e përdorimit të dokumentave të falsifikuara dhe nuk lejohet të hipë në avion. Në fakt, rezulton se ndalimi ishte një veprim i simuluar në kuadër të hetimit. Autoritetet kqyrën më pas kamerat e sigurisë dhe rezultoi se në pamje duken dy shtetas të cilët u afruan pranë portës së hyrjes së avionit ku ndodhej agjenti dhe më pas u kthyen pas. Ata u identifikuan si Robert Gjika, person me precedent të mëparshëm kriminale dhe Amarildo Luca. Dy personat nën hetim dyshohet se vëzhgojnë personat të cilët janë pajisur me dokumenta false, nëse janë duke hipur ne avion apo jo për t’u siguruar në lidhje me udhëtimin e tyre.
Pasaportat e falsifikuara
Dorina, synonte me cdo kusht që bashkë me mikeshën e saj, Argentën të udhëtonte drejt Mbretërisë së Bashkuar. Me ndihmën e Njiazi Ademaj ajo dhe mikesha e saj pajisjen me pasaporta italiane të falsifikara.
Dorina, siguroi pasaportën italiane me emrin e rremë Sonia Capasso, lindur në Romë. Ndërsa mikesha e saj Argenta do të udhëtonte me pasaportë italiane me emrin Martina Zenelli.
“Nga bashkëpunimi me autoritetet spanjolle, ka rezultuar se ka patur një rezervim bilete për fluturimin e datës 20 tetor 2023, Madrid-Barcelona, në emër të shtetases Dorina si dhe ka patur një rezervim bilete në të njëjtën datë në fluturim nga Sonia Capasso, e shoqëruar nga fluturim nga Martina Zeneli. Sa më sipër është provuar se subjekti Bashkim Sula ka siguruar dokumentat e falsifikuara për Dorinën dhe Argentët, të cilat jua ka dhënë Njazi Ademaj në rolin e ndërmjetësit, me qëllim që ata të shkonin në Mbretërinë e Bashkuar”, thuhet në dosje. Rezulton sipas hetimeve se pasaportat janë falsifikuar në një laborator në Kososë dhe i janë dorëzuar Njazi Ademajt nga shtetasi Fitim Rama, që konfirmohet të ketë hyrë në Shqpëri me automjetin e tij përmes pikës kufitare në Morinë, qëpërkon edhe me bisedën me subjektin Njazi Ademaj. Dokumentat false dyshohet se i ka marrë te Xhelal Krasniqi, sipas porosisë së Bashkim Sulës. Pra hetimet nxorën në pah se personat që synonin këto shtete, udhëtonin drejt Spanjës, akomodoheshin atje në hotele dhe përmes postës ju dërgoheshin pasaportat e falsifikuara; rumune, sllovene, bullgare pasaporta të falsifikuara austriake.
Ndalimet e shqiptarëve
Ermal P., u ndalua nga autoritetet spanjolle, me 18 janar 2024, në aeroportin e Madridit, pasi po përpiqej të fluturonte në Dublin duke përdorur një pasaportë bullgare me emrin Milen Kostov.
Igli Sh., kishte siguruar një pasaportë kroate false me të dhënat e shtetasit Bunic Neven. Ai u ndalua në mars të 2024 në Aeroportin e Barcelonës El Prat, teksa do të udhëtonte drejt Dublinit.
Orbjand T., po ashtu u ndalua në Aeoportin e Barcelonës duke tentuar të udhëtonte drejt Londrës me një pasaportë sllovene false me emër Milanko Krajnc. SPAK ka mundur të dokumentojë në bashkëpunim me autoritetet e huaja të paktën 44 raste kur shtetas shqiptarë kanë synuar Mbretërinë e Bashkuar me dokumenta false. Hetimi përmban të dhëna që dokumentojnë aktivitetin kriminal të grupit, mes të tjerash dhe përgjime e vëzhgime.
