Një 25-vjeçar nga Bangladeshi, që kishte ardhur në Shqipëri për të punuar e për të ndërtuar një jetë larg varfërisë së vendit të tij, humbi jetën tragjikisht mëngjesin e sotëm në Durrës, ndërsa një tjetër punëtor nga Kenia ndodhet në gjendje të rëndë në spital.
Ngjarja ndodhi rreth orës 08:00 në zonën e Fllakës, në Sektor Rinia, ku në një nga ambientet e magazinave të një subjekti privat ra zjarr në hapësirën ku gatuhej për punonjësit. Dyshohet se shkak është bërë një bombul gazi.
Viktima, i identifikuar me inicialet O. M., rreth 25 vjeç, nga Bangladeshi, dyshohet se ka humbur jetën nga asfiksia. Ndërkohë, shtetasi nga Kenia, Ch. Ch., rreth 30 vjeç, po lufton për jetën në spital.
Por përtej kronikës së thatë policore, kjo është edhe historia e atyre njerëzve që vijnë në Shqipëri për të bërë punët që shpesh vetë shqiptarët nuk i bëjnë më. Vijnë nga Azia dhe Afrika, larg familjeve të tyre, për të punuar në magazina, fasoneri apo kantiere, në heshtje dhe pothuaj gjithmonë pa u vënë re nga askush.
Dhe ironia e dhimbshme është se kjo ndodh në një vend ku gjysma e kombit jeton emigrant. Shqiptarët kanë qarë për bijtë e tyre të humbur nëpër tragjedi pune në Greqi, Itali, Angli apo Gjermani. Kanë kërkuar dinjitet dhe humanizëm për emigrantët shqiptarë jashtë vendit. Por shpesh, kur emigrantët e varfër mbërrijnë këtu, trajtohen thjesht si krah pune anonim, pa histori, pa emër dhe pa fytyrë.
Një i ri nga Bangladeshi erdhi në Shqipëri për të fituar jetën. Sot do të kthehet në vendin e tij në arkivol.
