Sherret mes të miturve janë kthyer në një fenomen shqetësues në shoqërinë shqiptare. Vetëm këtë vit, të dhënat tregojnë se afro 200 të mitur janë përfshirë në rrahje me njëri-tjetrin dhe, akoma më rëndë, në 15–20 raste janë regjistruar plagosje të rënda me dashje.
Rrahjet dhe konfliktet mes të miturve të moshës 14–18 vjeç, të cilat në disa raste kanë përfunduar edhe me përdorimin e thikave, kanë burimin kryesor në rrjetet sociale, të cilat më pas gjenerojnë sherre në oborret e shkollave dhe jashtë tyre.
Këtë vit, dy të mitur humbën jetën si pasojë e këtyre sherrreve me thikë: 14-vjeçari Martin Cani, në derën e shkollës “Fan Noli” në Tiranë, dhe 15-vjeçari Emiljano Gjoni në Shkodër. Në të dy rastet, të miturit humbën jetën nga thikat e përdorura nga bashkëmoshatarët e tyre.
