Ambasada e Shteteve të Bashkuara në Tiranë u ka bërë thirrje qytetarëve të tregojnë kujdes ndaj përpjekjeve për sigurimin e dokumenteve të emigracionit përmes martesave fiktive.
Në një njoftim të publikuar në faqen zyrtare në Facebook, Ambasada thekson se mashtrimi përmes martesës përbën krim federal në SHBA dhe ndëshkohet me pasoja të rënda ligjore. “Mashtrimi për martesë është një krim federal në Shtetet e Bashkuara dhe mund të çojë në dënime serioze”, thuhet në reagim.
Autoritetet amerikane u bëjnë thirrje qytetarëve që të ndjekin vetëm rrugët ligjore të emigracionit për hyrjen dhe qëndrimin në SHBA, si dhe për sigurimin e dokumentacionit të nevojshëm. “Gjithmonë zgjidhni një proces të ligjshëm emigracioni për të hyrë në vend dhe për të siguruar dokumentacionin e duhur”, përfundon njoftimi i Ambasadës.
