Rritja e çmimit të naftës ka sjellë pasoja të menjëhershme në transportin publik në Tiranë, duke shkaktuar reduktim të ndjeshëm të flotës së urbanëve dhe kaos në stacionet kryesore të qytetit.
Që prej mëngjesit të sotëm, qytetarë të shumtë janë përballur me vonesa dhe vështirësi serioze në lëvizje, ndërsa presin në radhë të gjata për të siguruar një vend në urbanët e linjave të kryeqytetit. Mjetet e transportit urban janë shfaqur të tejmbushura, duke krijuar situata të vështira për pasagjerët.
Sektori i transportit publik në Shqipëri ka hyrë në një situatë të rënduar.
Një ditë pas njoftimit zyrtar nga Shoqata Kombëtare e Transportit Qytetas dhe Shoqata e Transportit Urban dhe Interurban, shërbimi është reduktuar me 40% të flotës, ashtu siç ishte paralajmëruar.
Si pasojë, në Tiranë janë regjistruar vonesa të shumta dhe fluks i lartë qytetarësh në stacione, duke rënduar më tej situatën e lëvizjes në qytet.
Operatorët e transportit kishin paralajmëruar më herët se vendimi vjen si pasojë e mungesës së ndërhyrjes institucionale për të përballuar rritjen e kostove, veçanërisht të karburantit. Sipas tyre, deri më tani nuk është miratuar asnjë skemë kompensimi, nuk ka një plan konkret për lehtësimin e barrës financiare dhe nuk është ndërmarrë asnjë hap për rishikimin e taksave që ndikojnë drejtpërdrejt në sektor.
