Qindra qytetarë u mblodhën sot në sheshin përballë Parlamentit të Shqipërisë, për të kundërshtuar qëndrimin dhe deklaratat e kryeministrit Rama në Izrael. Me banera që shkruanin “Jo në emrin tim”, forcat policore nuk lejuan mbajtjen e marshimit të paralajmëruar drejt Kryeministrisë dhe më tej drejt sheshit “Skënderbej”.
Oganizatorët njoftuan që Drejtoria e Policisë pas njoftimit të marrë, ka lajmëruar që marshimi nuk mund të zhvillohet. Florian Arapi, e mbylli organizimin me thirrjen drejtuar vendimmarrësve të ligj-zbatimit për zbatim të ligjeve dhe jo të urdhërave.
“Ne do të vazhdojmë të protestojmë gjithmonë për Palestinën dhe kryeminstri ta ketë të qartë këtë në mendjen e tij. Asnjëherë ne nuk do të thyejmë ligjin por kërkojmë nga Forcat e Rendit që të zbatojnë ligjin dhe jo të zbatojnë urdhërat e pacipa të një kryeministri i cili i shërben zullumit, gjenocidit dhe padrejtësisë.”
Protestuesit akuzuan Ramën për bashkëpunëtor në gjenocidin që kryhet mbi popullin e Palestinës që prej më shumë se dy vitesh. Të shoqëruara me thirrjen “Edi Rama, kriminel” dhe “Turp!”, u hodhën akuzat për kryeministrin si normalizues të gjenocidit dhe mbështetës të kriminelëve të kërkuar për krime lufte nga gjykatat ndërkombëtare.
