Në Gjykatën e Posaçme do të zhvillohet sot seanca e dytë paraprake ndaj Erion Veliaj dhe 29 të pandehurve të tjerë, të cilët akuzohen nga SPAK për akuza të rënda penale nga korrupsioni, pastrimi i parave dhe shpërdorimi i detyrës. Në mesin e të akuzuarve, krahas ish-kryebashkiakut Veliaj janë edhe bashkëshortja e tij, familjarë të Ajola Xoxës, bashkëpunëtorë të saj të ngushtë, si dhe ish-deputetja e Kuvendit Klotilda Bushka dhe biznesmenë. Të pandehurit kërkojnë pavlefshmëri të akteve dhe për rrjedhojë pushimin e akuzës, ndërsa SPAK dërgimin e tyre në gjyq. Nuk dihet ende nëse seanca do zhvillohet, për shkak se avokatët kanë shpallur bojkot pas vrasjes së gjyqtarit Astrit Kalaja në sallën e gjyqit në Gjykatën e Apelit. Lidhur me Erion Veliaj, Gjykata Kushtetuese vendosi dje të pezullojë dekretin e Bajram Begajt për zhvillimin e zgjedhjeve për Bashkinë Tiranë me 9 nëntor si dhe të caktojë 31 tetorin si datë për shqyrtimin e kërkesës së ish-kryebashkiakut që pretendon që shkarkimi i tij është antikushtetues.
