Florian Binaj ka dalë mbrëmë për herë të parë në një emision televiziv si kandidati i opozitës për Bashkinë e Tiranës. Një kandidat ndryshe, me një profil publik dhe me angazhime ku nuk mund të lihej jashtë vëmendjes edhe fakti i fotove të tij me Edi Ramën dhe Erion Veliajn.
Ndërsa për Ramën ai sqaroi se e ka mbyllur “bashkëpunimin” që në vitin 2015, për Veliajn, zoti Binaj deklaroi se fotoja me të daton në vitin 2014-15, kur ai ishte ministër i Çështjeve Sociale. Në fakt, video e Binajt me Veliajn daton pak më vonë, në vitin 2018, ndërsa aktiviteti ndodhet ende online si një angazhim i kryetarit të bashkisë me familjet rome në Shkozë.
Ndoshta Florian Binaj nuk e mban mend mirë datën kur është zhvilluar aktiviteti, por vështirë se Erion Veliajn e ka harruar si kryetar bashkie. Në fund të fundit, nuk ka asgjë të keqe të kesh marrë pjesë në aktivitetet e Erion Veliajt në ndihmë të komunitetit. Si Binaj, ka me dhjetëra apo qindra artistë dhe njerëz të tjerë të njohur që i kanë dhënë një dorë Erion Veliajt në punën dhe propagandën e tij të përditshme.
Thjesht, kur merr përsipër ta sfidosh atë dhe partinë e tij si kandidat, duhet të jesh i vërtetë dhe i sinqertë për atë që përfaqëson. Përndryshe, Florian Binaj është një djalë i shkëlqyer dhe një artist i mirë, por regjizori këtë herë i ka dhënë për të lexuar në skenë një tekst që nuk i përshtatet me profilin. Ndaj më mirë se të aktrojë një rol që nuk i shkon për shtat, një qytetar i mirë si Flori duhet ti qëndrojë besnik profesionit dhe asaj që di të bëje me mirë. Përndryshe, politika është e mbushur me aktorë të dobët dhe regjizorë të zotë që dinë si ti përdorin ata në skenën politike.
Linku i takimit me Veliajn
