Në Komisionin për Evropën dhe Punët e Jashtme u regjistrua një përplasje mes deputetes së Partisë Demokratike, Ina Zhupa, dhe deputetit socialist Vasil Llajo, teksa po diskutohej për deklaratën e bërë një ditë më parë në Kuvend nga Taulant Balla ndaj Albana Vokshit.
Gjatë debatit, Llajo deklaroi se ai dhe Zhupa njihen me njëri-tjetrin dhe se madje “kanë ndarë gotën e verës bashkë para fushatës”, duke bërë thirrje që debati politik të mos zbresë në nivele denigruese.
“Me zonjën Zhupa ne jemi shumë miq. Madje kemi ndenjur dhe kemi ndarë gotën e verës bashkë para fushatës. Kështu që le të jetë kjo një frymë e përbashkët, që debatin politik dhe frontin politik t’i ndajmë me njëri-tjetrin, por jo të zbresim në nivele denigruese dhe morale ndaj njëri-tjetrit”, u shpreh Llajo.
Kjo deklaratë u kundërshtua menjëherë nga Zhupa, e cila tha se nuk është e vërtetë dhe se nuk e njeh deputetin socialist.
“Për sqarim, nuk është e vërtetë. Zotin Llajo nuk e kam njohur. Unë nuk pi verë dhe këtë e dinë të gjithë kolegët. Kështu që ajo që tha zoti Llajo në fund të fjalës nuk është e vërtetë. Mund të jetë fryt i dëshirës dhe fantazisë, por nuk është e vërtetë”, u përgjigj Zhupa.
Pas kësaj, Llajo replikoi sërish duke iu drejtuar deputetes demokrate: “Zonja Zhupa, fantazitë e mia nuk i kalojnë ato të tuat.”
