Kreu i Partisë Demokratike, Sali Berisha, u paraqit sot në Prokurorinë e Posaçme në zbatim të masës së sigurisë detyrim paraqitje. Pas daljes, ai dha një deklaratë për mediat, ku lëshoi akuza ndaj kryeministrit Edi Rama dhe drejtuesve të SPAK.
Në një komunikim me gazetarët, ai është shprehur se Ergys Agasi është një “vizitor i shpeshtë i Surrelit”, duke shtuar se edhe pse në kërkim ai vijon të lëvizë i lirë.
“Aty gjeta Ergys Agasin bashkë me Irena Dumanin, Irena Maneku Gjoka Dumani. Festonin, Gysi festonte se asnjë mandat ndërkombëtar nuk është lëshuar për arrestimin e tij Gysi gjoja është në kërkim, ai në fakt rrugën më të shpeshtë që bën e bën për në Surrel. Ai është vizitor i shpeshtë i Surrelit. Sot thashë Dumani merr dhe mbiemrin Maneku, sepse në një akt më të turpshëm, flagrant të mbrojtjes së krimit, Edi Rama dhe Altin Dumani nxorën të pafajshme Irenën me pesë mbiemra”, tha ai.
Berisha riktheu edhe çështjen “Partizani”, ku ai akuzohet për korrupsion në procedurat e privatizimit. Ai theksoi se gjatë procesit është kërkuar që kryeministri Rama të merret në pyetje:
“Rama është kërkuar nga të akuzuarit që në fillim që të jetë dëshmitar, madje jo dëshmitar, por në ndjekje penale.” Sipas tij, Rama ka ndërhyrë në territorin e klubit sportiv “Partizani”.
“Një pjesë të mirë të territorit të klubit ‘Partizani’ e kishte shndërruar në zonë ndërtimi pa asnjë kërkesë të pronarëve, përveç të peshkaqenit Olsi Rama. Rama dha lejet e ndërtimit te klubi Partizani. Më pas mori vesh se një nga pronarët është Malltezi dhe, pavarësisht se leja ishte dhënë, ai nuk e zbardhi. Gjykata e urdhëron ta zbardhë, ai nuk zbatoi vendimin e gjykatës. Rama dërgoi Inspektoriatin e tij dhe bllokoi punimet, për çka u dënua 320 mijë euro nga gjykata, shumë që u pagua nga buxheti i bashkisë”, tha ai.
