Kreu i Partisë Demokratike, Sali Berisha, ka reaguar pas paralajmërimit të Ambasadës Amerikane në Tiranë mbi rrezikun e mundshëm të sulmeve në vend, duke kërkuar përforcimin e mbrojtjes ajrore nga NATO.
Në një prononcim për mediat nga Shkodra, Berisha u shpreh se paralajmërimi nuk mund të jetë pa bazë dhe duhet marrë seriozisht nga institucionet shqiptare. Ai bëri thirrje që Aleanca e Atlantikut të Veriut të garantojë mbrojtjen kundërajrore të Shqipërisë, duke e krahasuar këtë me mbështetjen që, sipas tij, NATO i jep vendeve të tjera
“Thirrja që lëshon ambasada amerikane një muaj pas luftës në Gji, absolutisht nuk është pa substrat. Nuk është pa substrat, nuk mund të jetë ajo.
A është Shqipëria në një armiqësi me Iranin, kjo nuk diskutohet, nuk fshihet.
Tani cili është qëndrimi ynë? Unë i bëj thirrje Aleancës së Atlantikut të Veriut, ashtu siç po mbron Turqinë, të na garantojë mbrojtjen kundërajrore nga aktet e tyre.
Kurse për aktet e brendshme, duhet që forcat e rendit të garantojnë rendin dhe qetësinë.
Këtu është gjëja më e domosdoshme.
Por të krahasosh ato me protestat e opozitës, je i sëmurë, ke psikologjinë e Ajatollahëve.
Dhe unë u them turp të kenë që nxjerrin një vlerësim të atillë.
Nuk lëshohet një paralajmërim pa një bazë. Kjo është e sigurt.
A ka Shqipëria mbrojtje nga NATO? Po, çdo vend i NATO-s, hapësira ajrore e Shqipërisë është hapësirë e NATO-s dhe të sigurt jemi se NATO do na mbrojë.
Kjo nuk do thotë se NATO do na mbrojë në tokë, këtu duhet të jenë shqiptarët vetë që të kenë vëmendje”, tha ai.
Ai shtoi se hapësira ajrore e Shqipërisë është e mbrojtur nga NATO, por mbrojtja në tokë mbetet përgjegjësi e shqiptarëve vetë.
