Protestat e nxënësve të shkollave të mesme në Francë janë përshkallëzuar, duke sjellë përplasje me policinë, mijëra të arrestuar dhe mbylljen e qindra institucioneve arsimore.
Më shumë se 5 mijë persona janë arrestuar gjatë ditëve të fundit, shumica prej tyre adoleshentë, ndërsa dhjetëra persona kanë mbetur të plagosur. Në disa qytete, policia ka përdorur gaz lotsjellës për të shpërndarë protestuesit.
Protestat nisën në rajonin e Parisit për shkak të mungesës së mësuesve dhe më pas u përhapën në të gjithë vendin. Nxënësit kundërshtojnë gjithashtu mbipopullimin e klasave, kushtet e dobëta në shkolla dhe problematikat në sistemin arsimor.
Sipas autoriteteve franceze, rreth 400 deri në 500 shkolla të mesme pritet të qëndrojnë plotësisht ose pjesërisht të mbyllura. Gjatë protestave janë regjistruar edhe akte dhune e vandalizmi, ndërsa 24 shkolla janë dëmtuar ose plaçkitur.
Qeveria franceze ka bërë thirrje për rikthimin e rendit, ndërsa sindikatat e nxënësve kanë paralajmëruar vijimin e protestave dhe një ditë kombëtare demonstratash.
