Në Gjykatën e Posaçme në procesin “Plumbi i Artë” i penduari i drejtësisë Erion Alibej iu përgjigjet pyetjeve të avokatëve.
Konkretisht, seancën e së martës Alibej iu përgjigj mbrojtësit ligjor të të pandehurit Xhuliano Hoxha.
Ai foli për vrasjen e Emiljano Ramazanit në Elbasan. Ai deklaroi se Nuredin Dumani nuk e njihte Emiljano Ramazanin dhe se ishte ai që i kishte dhënë informacione edhe për Elio Bitrin.
“Ne nuk kishim një plan konkret. Nuk kishim një listë. Shikonim dhe e vlerësonim si do vepronim? Emiljano Ramazani ka qenë njeri i afërt i Talo Celës, i Mikael Qoses i vëllezërve Çopja. Kisha informacione pa fund për të,” tha Alibej.
I penduari deklaroi se ditën e ekzekutimit të Ramazanit ka folur me Xhulianon.
“Emiliano rrinte gjatë në palestër. Nga dita kur u nisëm për ekzekutimin e tij e derisa ai doli nga palestra, Xhuliano ka qenë gjithmonë aktiv. Ka qëndruar aty dhe kemi folur bashkë në vijimësi në SKY ECC,” tha Alibej.
Sipas tij, informacioni ishte i besueshëm dhe informator ishte Xhuliano Hoxha.
“Për vrasjen e Emiliano Ramazanit kam komunikuar me Nuredinin. Duhet të çoja pagesën tek rrethi tek TEG. Kam dërguar Arsen Preçin atje me 80-85 mijë euro. Mesa mbaj mend, ka shkuar një vajzë me taksi atje, që ka marrë lekët,” tha Alibej.
Ai theksoi se Xhuliano Hoxhën e kishte paguar gjithë kohës.
